Chill and Grill (裝修中)

Happy Friday約咗朋友喺堅尼地城食飯，去咗一間裝修好有特色嘅歐陸風餐廳Chill and Grill，樓底高，空間感好好，原來係「大叔的愛」電視劇取景地之一，唔怪之得咁打卡啦🤩佢哋最近推出咗懷舊港式鐵板晚餐，一定要試吓！我哋點咗鐵板西冷扒以及鐵板豬扒，有五種醬汁可以選擇。西冷扒牛味十足，肉質緊實，趁熱倒入醬汁即刻聽到滋滋聲出晒煙，香氣四溢🤤鐵板豬扒更有驚喜，非常推薦，富有肉汁，一啲都唔柴，配埋黑椒汁真係冇得頂👍🏻另外，我哋仲加咗周打蜆肉酥皮湯以及兩杯特色飲品。製作需時20分鐘，酥皮外脆內軟，有好濃烈嘅牛油香氣，配搭香滑蜆肉忌廉湯，口感同味覺都非常豐富！食鐵板扒梗係要配返黑牛同菠蘿冰呢啲充滿香港特色嘅飲品，上面嘅雪糕啱晒打卡😆最後加左個芒果拿破崙都好有水準，酥皮香脆之餘，芒果忌廉嘅甜度都調配得恰好，食完之後可以去堅尼地城海旁行吓好寫意☺️