影片
更多
2014-05-17
3261 瀏覽
小弟家住美孚，曾幾何時都有一間「上海婆婆」，其實質素都唔差，裝修又夠時尚，不過，最後都結咗業；亦曾經幫襯過牛頭角道淘大商場嘅「上海婆婆」，仲記得一大班人食得好滋味添。今回老友吹雞叫開飯，地點喺嚟尖沙咀國際廣場嘅「上海婆婆 336」，知道佢喺「上海婆婆」嘅副線，針對年輕朋友，當然好有興趣啦。又再次掹住食友衫尾，小弟就老實不客氣，多謝老友請客！查實都未嚟過上海婆婆336，嚟到先知咁唔同，一反傳統老派滬菜店嘅格局，若非門口有大大個招牌，否則都可能以為自己搵錯地方。餐廳嘅用餐區以環形設計，正正中間喺廚房，近門口左邊嘅卡位似足西餐廳，而近門口另一列吧位已夠晒有型，繼而再進入大廳，不規則花紋地磚搭水泥地、水泥牆身、鎢絲燈膽、木枱木椅，懷舊得嚟型格唔老套。最意外喺晌尖沙咀依啲黃金地段，枱椅排得一啲都唔密，所以，坐落輕鬆舒服。主餐牌印刷精美，分門別類有齊冷菜、湯類、豆腐、河海鮮、豬牛、雞鴨、小炒蔬菜、飯麵、手造拉麵、點心、甜品及飲品，選擇過百款，可謂一應俱全。除咗有列明一啲「本店推介」，等大家減少選擇困難，仲有一啲「辛辣」提示，而部分菜式又有圖片以供參考，確實喺依家對食肆嘅要求。雖然，上海菜嘅基本特點
查實都未嚟過上海婆婆336，嚟到先知咁唔同，一反傳統老派滬菜店嘅格局，若非門口有大大個招牌，否則都可能以為自己搵錯地方。餐廳嘅用餐區以環形設計，正正中間喺廚房，近門口左邊嘅卡位似足西餐廳，而近門口另一列吧位已夠晒有型，繼而再進入大廳，不規則花紋地磚搭水泥地、水泥牆身、鎢絲燈膽、木枱木椅，懷舊得嚟型格唔老套。最意外喺晌尖沙咀依啲黃金地段，枱椅排得一啲都唔密，所以，坐落輕鬆舒服。
主餐牌印刷精美，分門別類有齊冷菜、湯類、豆腐、河海鮮、豬牛、雞鴨、小炒蔬菜、飯麵、手造拉麵、點心、甜品及飲品，選擇過百款，可謂一應俱全。除咗有列明一啲「本店推介」，等大家減少選擇困難，仲有一啲「辛辣」提示，而部分菜式又有圖片以供參考，確實喺依家對食肆嘅要求。雖然，上海菜嘅基本特點為湯滷醇厚、濃油赤醬、糖重色豐，但現今講求健康之下，又喺針對年輕人市場，所以，菜式晌味道上都略作調校！
等候上菜時，再細看餐枱紙，始知道「336」嘅意思，仲以為好似阿信屋個代號喺股票「冧吧」，啊！原來喺上海話嘅諧音「謝謝儂」，即喺多謝你咁解，明白晒！
冷菜足足有22款，一般都喺細細份，對下幾款冷菜都屬「本店推介」，除咗個醉雞皮唔夠爽，其他嘅都做得相當出色，幾款都值得推介，而最得歡心就喺個燻蛋，超正！無錫脆鱔 $88
黑掹掹嘅脆鱔賣相一啲都唔討好，佢唔止醜，仲「心靈」脆弱，一咬估唔到脆鬼到卜卜聲，真喺跟平時食鱔嘅口感完全兩回事；再用糖醋做個汁，件件脆鱔都掛滿汁，沉厚酸香，上佳嘅開胃冷菜。
冰鎮醉黃油雞 $72何止「冰鎮」，直情「霜降」！晌醉雞面放上一層碎刨冰，未食已感到涼透心。食嘅時候，醉雞份外冰涼清爽，加上酒香淡雅，入肉三分。不過，仍有改進地方，味道相對鹹咗少少，而雞皮亦未夠爽。
芹香小木耳 $48木耳本身好爽脆，入口有少少醋香，又帶少少日本芥辣味，一啲唔嗆喉或攻鼻，點到即止；至於內裡嘅西芹粒，覺得點綴大於實際。
魚籽煙燻蛋 $16 / 隻賣相實在一流，蛋黃金黃，半凝半黏，加上點點黑魚籽及一小片薄荷葉作裝飾，份外誘人。燻蛋有輕輕煙燻味，蛋黃柔滑凝香，溏心效果出眾，一半配黑魚籽食，蛋香中有份鹹鮮，另一半配薄荷葉食，濃郁裡有份清爽，好食唔在講，味道富特色！
砂窩醃篤鮮 $32位 / $98例湯類以醃篤鮮較實惠，湯底奶白，但飲落鹹香，內有五花腩、金華火腿、百頁結、小棠菜、竹筍，腩肉及火腿吊起成個湯嘅味道，而竹筍切得大舊，特別爽脆。
11款河海鮮類中，揀嚟鹹香蝦球及松子黃魚，雖然唔喺「本店推介」，但做得不俗。鹹香蝦球 $122
鹹香菜式一向好啱小弟，加埋配合大海蝦，超啱心水啦。睇落應該喺一道唔太複雜嘅菜式，大海蝦泡油後再加鹹蛋黃炒，簡單得嚟味美，蝦鮮肉爽，鹹蛋黃惹味鹹香，最欣賞喺個鹹蛋黃漿做得薄薄一層，仲帶點酥脆口感。
松子黃魚 $158黃魚嘅鎅花唔算好分明，但淋上橙紅嘅甜酸茨汁，其實已經好吸晴。黃魚外皮都幾酥脆，魚肉亦幾柔嫩，茨汁甜酸細緻，雖然菠蘿喺罐頭貨，松子仁及青豆都喺裝飾多，但整體而言，做得唔錯嘅菜式。
河海鮮類都食得滿意，咁豬牛、小炒蔬菜類又如何呢？開心果露筍炒牛肉粒 $88
初頭有啲擔心，露筍炒牛肉粒應該幾好，但加開心果好似唔太夾。最後出嚟個效果唔嗻話好差，亦唔講得有驚喜，其實。脆口嘅露筍粒，配搭埋嫩滑牛肉粒，食味已經不俗；開心果帶點鹹香，但口感唔喺脆，又唔喺腍，有少少煙韌咁樣，感覺有啲唔知點！如果真喺要加啲果仁類嘅嘢，老套啲嘅炸腰果唔知會唔會效果好啲呢？所以，作為「本店推介」菜式，個人覺得有啲落差！
野生椒牛仔肉 $75不愧喺「辛辣」菜式，睇個樣都已經嚇得吓，實際上就真喺唔止靠嚇，辣勁鮮明。牛仔肉非常細嫩，入口柔滑，惹味刺激，嚐辣嘅老友更加唔好錯過。之後點咗個蔥花家常薄餅，夾埋啲牛肉食認真唔錯喎！
乾煸四季豆 $62四季豆乾煸得夠乾身，最滿意喺四季豆仲保持一定爽口，加有少少肉末、中芹粒，口感豐富咗，又喺另一惹味之作。
飯麵及手造拉麵類亦有好多選擇喔，前者有10款，後者更多，有成15款，想飽肚墊底，梗有一款啱你合味。黃金炒飯 $68
「黃金」喺嚟自黃薑粉，唔單止炒得粒粒金黃好睇，兼且有朕朕黃薑香，朋友仲話黃薑具活血及止血功效，所以個飯既好食，又有營；此外，仲加入蝦仁、牛展粒、鹹蛋黃同炒，飯粒又分明，意外咁好食。
嚟到食上海菜，又點可以唔試吓啲滬式點心，一口氣試咗4款，非常滿足！336小籠包 $32 / 4隻
摺紋及收位都似模似樣，而皮薄有得你睇，一眼就望到小籠包內盪漾嘅湯汁。熱辣辣趕快食，一夾無黐底，原來墊咗一薄片蘿蔔，好細心呀！小籠包內湯汁果然豐滿，豬肉餡又打得鬆化，唔沾醋食都OK。
阿蘇大籠包 $30依個珍寶呎吋嘅「大」籠包，叫嚟都志在見識多，大大個大籠包，湯汁一樣滿載，店員教路正確食法應該先用飲管飲晒啲湯汁，再慢慢食得包。我哋貪得意試吓夾唔夾得起佢，師傅果然手工到家，皮依然搓得薄，但夾起嚟又唔易穿。
蔥花家常薄餅 $52 / 4件除蔥油餅，仲有依款蔥花家常薄餅， 即叫即做，所以送上枱時熱辣辣。家常薄餅比起蔥油餅薄身，我估大概喺蔥油餅厚度嘅1/3，柔韌中帶點鬆脆，餅內混入滿滿蔥花，蔥香十足。再加埋一大片野生椒牛仔肉，別有風味！
青花椒湯雲吞 $45 / 8粒小弟覺得個雲吞雖然唔喺重點，但皮滑肉香，手功唔差；個花椒湯反而喺高潮所在，湯頭睇落幾清，入口微辣，隨之而來就喺花椒嘅麻香，一陣陣令條脷有點發麻嘅感覺，過癮有趣嘅味道。
最後嘅甜品時間，香蕉高力豆沙唔少得，又有小弟心水嘅南瓜餅，反而個凍什果酒釀丸子本著一試心態嚟試吓。香蕉高力豆沙 $42 / 4個
雖然一客4個，但亦可以要求加碼，較具彈性，多一個就額外俾多$12啊！粉糰炸得漲漲，入口非常軟綿綿，內裡夾雜香蕉與豆沙，清甜滋味。
南瓜餅 $38 / 4個同樣可額外加碼，亦以豆沙作為餡心，不過，份量比起做高力豆沙為多，豆沙又綿又沙。而南瓜餅餅身其實又唔喺好重南瓜味，反而，做得挺身，煙糯唔黏牙，質感唔錯。
凍什果酒釀丸子 $28酒釀丸子食得多，店家都有賣，同樣$28一碗，不過，凍嘅仲要加什果印象中應該第一次，明顯針對後生仔嘅搞作。夏天食又幾唔錯，清清涼涼，又有點酒香及桂花香，多咗什果，無咁單調，只喺嫌丸子好似煮得未夠透！
正所謂睇戲食飯、食飯睇戲，一喺睇完戲先食飯，一喺就食完飯跟住睇場戲，樓上就有間戲院，拎住當日戲飛嚟食飯，有9折，咁個邏輯喺咪應該先睇場戲，跟住落嚟上海婆婆度食飯呢！
環境舒服咗，菜式精緻咗，服務又到位……為嘅都喺不斷尋求突破，傳承之間，都讓更多後生一輩認識上海菜，「婆婆」，336啊！
張貼
