浪人日本料理 (已結業)

M佬工幹第一晚，屋企煮麵食；M佬工幹第二晚，買咗個麵包食；M佬工幹最後一晚，我決定對自己好啲，今晚就去中環蘭桂坊覓食！唔好諗多咗，我嘅覓食意思係搵間fine dine食好西，對自己好啲先得！食我最鍾意嘅日本菜 － 浪人日本料理。枝豆一坐低店員就送上枝豆，同平時食開嘅唔同，呢個枝豆經過調味同微煮，除咗有微香嘅蒜味，仲有清香嘅醬油味。壽司今日選擇咗四款壽司：三文魚、帆立貝、牡丹蝦、吞拿魚腩。三文魚嘅魚脂味十足；帆立貝就夠晒彈牙，仲好膠口；牡丹蝦就成隻手掌咁大隻，蝦肉好鮮甜，極富彈性，鮮爽無比；至於食到我嘩嘩聲就係呢碟吞拿魚腩，魚脂分佈鮮明，而且夠晒新鮮，仲有入口即熔嘅感覺！季節魚刺身呢度嘅海產主要由東京築地空運到港，因為受到季節同時令嘅影響，所以每星期嘅刺身都唔一樣，而今晚嘅選擇，好多款我聽都未聽過，但最令我味覺喜愛嘅就係金目鯛同黑陸，魚味夠晒鮮濃，真係好想encore再encore！味噌豚肉鍋至於主菜嘅選擇就係豚肉鍋，豚肉係選用五花腩，但就一啲都唔肥，只係得近皮有少少脂肪，食落唔油膩，肉質夠嫩，至於湯底味道清清哋，唔會太濃，食完又唔會話好口喝！