莆田 (已結業)

美食沙漠馬鞍山竟然會開咗間米芝蓮一星餐廳，點都要試下。餐廳好細，坐落之後同隔離枱都真係手臂貼手臂。不過張枱就都真係好細，擺晒杯碟之後，基本上都擺唔到食物。食物份量全部係袖珍板，你話食份子料理都有人信。喺新加坡食嘅時候，都係細份量，但好似唔係細到咁。上菜速度快，但服務真係完全唔掂！所有人都係好似無受過訓練咁，上菜唔夠位，竟然可以玩冰壺咁推碟，仲有一次一下橫掃我d碗筷，推到我對筷子喺枱邊就快跌落地！最出名嘅冰鎮苦瓜，唔知係咪苦瓜品種問題，一d苦瓜嘅甘甜味都無，亦切得唔夠薄！小食拼盤，我唔食內臟，豬腸無食，豆卜本身得兩件，無特別。豬腳凍，食咗一粒，完全無味，大菜糕咁款。紫菜，咪就係平時食魚蛋粉味d紫菜，完全無分別。香酥鴨，幾好，芋頭蓉包住鴨肉，鴨嘅油香味唔算豐富，不過正因為咁，無咁膩。外層亦炸得好鬆脆。鹵麵，一見到都唔多開胃，相都唔影。碗麵就好似糊仔咁，好似煮咗好耐，索晒湯咁。麵一夾即斷，無牙都食到。雖然奇貎不揚，但已經係全晚最好。整體而言，份量細，價錢唔平，服務奇差！所謂米芝蓮，其實真係間間唔同，就算同一集團，都真係唔等於唔會中伏。不過既然用米芝蓮一星做招徠，就請用心做好d。