喇沙專門店 (已結業)

放工，要食好嘢降皮質醇。呢碗(好似)係近排網絡上大熱嘅food court神級喇沙，上枱賣相比餐牌上只供參考嘅相片更靚，擺碗睇得出有心機，湯底椰香濃郁但唔會杰撻撻，椰漿味又唔會蓋過上湯嘅鮮味，湯面嘅咖哩油亦剛剛好唔覺肥膩。兩隻海蝦有中蝦斤両，蝦鬚完整冇斷冇甩，蝦肉鮮甜爽脆，好正！其他配料如芽菜、魚片、豆卜非常足料，味道唔錯。麵底係上海幼麵，索湯一流，但口感有少少立立哋，如果有得揀米線會仲好，下次有機會同大廚反映吓！如果鍾意食辣，可以叫阿姐加辣汁，但我呢次冇加。當晚咁啱見阿姐放宵夜，見佢自己整咗碗什錦喇沙湯飯，覺得絕對可以上埋menu囉！至於環境，冇乜嘢好講，幾嘈，因為係西九入面嘅街坊式food court，地方還算乾淨整潔。