坤記煲仔小菜 (已搬遷) 新店位置

西環坤記呢間坤記好出名，主打煲仔飯，次次6pm點開5:30pm都已經排晒長龍，除咗煲仔飯出名好食之外，要有心理準備，服務麻麻，姐姐態度燥底大聲但仍然想保持友善(只要聽佢講坐邊同耐心等候)，衛生一般，要同一大堆人搭枱，要等個半鐘先食到，真心何方神聖呢？🤣🍴椒鹽九肚魚 $90 (1/10)份量比上次食少，今次噴九肚魚竟然唔係即叫即炸，係微温，應該炸咗好耐😂九肚魚一啲就好鹹，一啲就冇味，個皮都係脆嘅，但個九肚魚好腥，肉質好一pat pat😂😂 真係食一啖就唔想再食😂🍴枝竹牛腩煲 $85 (5/10)真係熱辣辣嘅牛腩煲，竹枝比牛腩多好多，牛腩炆得入味，都淋身，食落就係蠔油嘅味道，鹹鹹地，唔係話特別好食，正常🤣🍴白鱔煲仔飯 加潤腸 $105+$20 (10/10)等咗個半鐘煲仔飯終於有得食！新鮮熱辣辣整起，店員溫馨提示唔好掂到個煲。超級香白鱔潤腸味，白鱔蒸得啱啱好，肉質彈牙新鮮，潤腸唔會太油膩，好香，白鱔潤腸嘅油香滲透曬落個飯度，飯先係精華🤩飯粒粒粒分明，好香白鱔鮮味，潤腸油香，仲有恰到好處嘅飯焦，真心係超好食🤤🤤推薦指數: 8/10推薦指數係俾個煲仔飯嘅😂淨係食煲仔飯就好啦，小菜真係唔值呢個價