珍豆漿 (已結業)

平時我對素食一般，但個日行過灣仔見到珍豆漿，覺得不妨一試，因為佢除左有正常飯類，仲有粉麵、甜品等選擇。既然店名叫珍豆漿，當然要先提一提豆漿。豆漿味濃，有冷熱選擇。飲落絕對唔甜，但成份表有提及糖份。基本上我認為係相當健康嘅豆漿，似自己整唔落糖個種味道，大部分人都應該啱飲。食物我叫左雪菜素肉絲湯麵，馬來咖哩雪魚飯。雪菜素肉絲湯麵同街外其實冇咩大分別，多左翠玉瓜同少少菜。湯底冇咩味，非常清淡。如果食慣重口味就未必食慣呢間食肆。另外馬來咖哩雪魚飯，咖哩冇辣味，少少都冇。不但食落冇，聞都冇。雪魚係用齋造，唔係真的新鮮魚。加上少量蕃茄、青瓜等伴菜製成。不過成碟飯最好食就係雪魚。概括講，我未必會再光顧，因為唔近之餘，附近都冇咩地方行街。相信唔少人都會同我一樣，鍾意食完飯行下街消化下。食物亦冇特別吸引，令我想再食，算係中規中矩。味道偏淡，近乎冇調味。