珍姐廚房

營業中

休息中

首先講吓呢間餐廳點解叫珍姐，原來真係有一個叫珍姐嘅人一腳踢，廚師、侍應、收銀全部都係佢，認真利害。呢間餐廳應該係做街坊生意，入到去基本上全間餐廳啲人都係一齊傾緊計。餐廳入邊麻雀雖小但五臟俱全，最多應該只可以坐到10多人，但係食物嘅質素真係唔錯。餐單主要有蒸飯、碟頭飯、同埋原條魚可以選擇。今次我就食咗個豉汁雞翼蒸飯，可能因為珍姐一腳踢嘅關係，而且係即叫即整，佢需要嘅時間可能長少少，不過就真係好好食，雞翼好嫩滑，豉汁再加埋甜豉油非常好食。另外再叫咗個豆苗，用蒜爆一爆上碟，豆苗炒得啱啱好，食落好爽好清新。另外老闆娘仲好好人，送咗碗湯比我飲，咁有人情味嘅餐廳已經買少見少，一定會再幫襯。