名館 (已結業)

打風先黎落雨，唔通連個天都想我出街食？收工仲掛緊三號波但無阻同朋友嘅飯聚，朋友又去完日本旅行，大家相約老銅飯聚順便拎手信，所以食中菜就最啱了。呢度雖然位處銅鑼灣，但食物價錢非常親民！柚蜜炸蝦球。醬汁味道略酸偏甜柚子味好清香，炸皮好薄所以唔吸油，加上蝦仁大大粒又爽口。雖為油器但不油膩。和風炒飯。炒得乾身所以飯粒食落彈牙，調味用上照燒汁之類嘅醬料，味道唔會好重／咸（雖然睇落好濃味）春卷。炸得好香口同乾身，入面嘅蝦肉餡調味重啲啲，平衡返春卷皮清淡嘅味道。蒜苗蒸勝瓜。雖然用左幾多蒜泥鋪面，但味道唔嗆。勝瓜本身好甜加上少少上湯調味，好好食。同埋唔可以錯過墊底嘅金針菇，佢吸收晒勝瓜同蒜香味，入味非常。厚切叉燒。色澤紅潤肥瘦相間，蜜糖上色得均勻，一睇就知道係靚叉燒。入口肉嫩多汁仲有少少燶邊，就正正係燶左嘅部分增添左叉燒嘅口感同味道，正。有時食飯唔需要大魚大肉嘅，同朋友簡簡單單食個飯就係生活中的小確幸。