Hea Ha Hea Ha 居酒屋

營業中

休息中

上星期搵到尖東樓上一間日式餐廳，好多菜式都比較少有機會食到，而且好啱咁熱嘅天氣食，值得一試。前菜炸芝士配酸蘿蔔同筍兩款漬物，惹味嘅芝士同酸得嚟爽口蘿蔔同筍，降溫又開胃。先叫咗沖繩苦瓜秋葵沙律，沖繩苦瓜好清爽，而且苦中帶甘，配埋海帶柚子絲同飯素調味，成個沙律酸微微咁，健康又消暑。牛小排串，食得出師傅嘅功架，外面焦香，入面嫩口juicy，牛小排肉質有咬口，仲加咗椒鹽調味，食落口感滿分。豚肉蘆筍卷，油脂感十足嘅豚肉配合爽口嘅蘆筍，好夾又唔會太油膩。燒原殼日本岩手生蠔，生蠔夠曬厚肉，加咗番紅花，別有一番風味。鹽燒大白鱔，魚肉彈牙肥美，皮好脆，一啖咬落去好有滿足感。日本味噌牛什煮，好少見日式嘅牛雜，唔同部位都煮到好入味，而且落咗番紅花同海帶調味，口感豐富。燒日本淮山，望落去成粒帶子咁，食落爽口，既健康又好食。最後叫咗玉子燒，甜得嚟帶少少鹹味鹹鹹地，係一個完美嘅收結。