韓流村 (已結業)

位於尖沙咀嘅韓流村，由韓國引入地道燒烤，仲用埋韓國廚師提供地道燒烤同別緻菜式。加埋佢地用圓檯，成個Friend飯局坐埋一齊吹水燒野食就係咁簡單！餐廳裝潢極具街頭風，室內空間充足，坐喺圓檯，成班朋友一齊圍埋食住燒肉吹水最開心！食韓燒配料非常重要，呢度都算幾好食，尤其泡菜唔會過鹹，甜甜地帶點辣，配搭起嚟好加分！而且前菜仲係無限任添㗎。選用西班牙黑毛豬，脂肪分佈平均，肉質結實又爽口，加埋泡菜食更加惹味！韓國藍蟹直送香港，再喺香港新鮮醃製。就咁食個藍蟹多膏鮮甜，食落有少少鹹香，隨蟹仲會附送6舊紫菜飯糰，一齊食更滋味！只需要將飯糰加落蟹蓋，再混和蟹蓋本身有嘅醬汁同蟹膏食，食起嚟感覺鮮甜、別具風味，一定要試！食韓國菜當然唔少得炸雞，辣之中帶點蒜香，醬汁惹味香濃。入口嘅時候，外皮香脆但唔會硬，唔會成塊皮剝落，一啖咬落去可以一次過食晒雞皮同雞肉。佢地仲有原味同蒜味炸雞，就算唔食辣，都一樣可以食到。