Attic Handmade Pasta (已結業)

餐廳環境格調高雅，極高嘅樓底配襯水晶吊燈，燈光柔和浪漫，係絕對嘅 fine dine 格局。蕃茄濃湯，濃湯由新鮮蕃茄原隻打成，蕃茄味道濃郁到無朋友，配襯著上面嘅炸麵包粒，口感鬆脆。香煎安格斯側腹膜橫肌薄片、阿根廷青醬，安格斯牛肉薄片呈現極誘人嘅粉嫩紅色，唔點個青醬先試一啖，牛味香濃，五成熟係我最愛嘅熟度，屬水準之作；點一點個青醬再試一啖，青醬裏面混和咗蒜蓉同埋橄欖油，叫人驚喜。蝦子香蒜辣椒意粉，意粉賣相非常精緻，面頭舖滿密密麻麻嘅蝦子同埋煎香咗嘅蒜片，意粉選用咗扁意粉，硬度係我最鍾意嘅 all dente，蝦子香蒜加上微辣，非常惹味。法國釀無骨春雞、羊肚菌汁，春雞個子不少，雞肉嫩滑， 廚師將雞皮都整到好香脆，on 緊 diet 嘅 friend 子都話要連埋皮食，羊肚菌汁混合極豐富嘅菇香，令人回味。伯爵奶茶凍，奶凍水潤動 L，入口異常咁滑溜，同伯爵茶個味道非常之夾。