鳥鑫

營業中

休息中

今日去返之前試過嘅呢間居酒屋，食物好味又坐得舒服。前菜先叫啲健康嘅蔬菜，有野菜條（椰菜同蘿蔔），配埋辣味噌醬，開胃又健康。仲叫咗日本銀杏，大大粒連皮一齊燒，食落好香口。田雞腿係我最鍾意嘅串燒之一，肉質好滑，皮又香，加上少少柚子胡椒，更加香更加惹味。煙燻鹿兒島豬腩都好好味，煙燻過令到佢嘅肉味更加濃郁，同時燒到嗰邊有少少焦香，而且肥瘦適中，少少肥啱啱好帶出油脂香，上面仲有藏紅花調味。雞全翼，飽滿多汁，食到好滿足。免治雞肉棒，可以點蘭王雞蛋嚟食，啖啖肉嘅雞棒配合香濃嘅蛋香，簡直令到味道昇華。雞心，比較小機會試到串燒，幾好咬口。雞生元，即係雞嘅血管部分，第一次食，原來係咁彈牙爽口。香蔥鴕鳥，肉味比一般雞肉更加濃郁，好特別！燒翠玉瓜，燒咗之後更加多汁，真係好好食。最後仲試咗佢哋嘅燒菠蘿，上菜嘅時候出曬煙，上面有焦糖，可以拔絲，好甜好好味。我仲叫佢哋嘅烏龍茶割燒酎，係一種highball，配串燒一流。