新派韓食館 (已結業)

今日約咗朋友去大圍踩單車，踩之前上網搵下有咩食，發現有間韓國菜，就決定試下！餐廳位於一個屋村商場入面，距離大圍站都有一段距離，都搵左一陣。估唔到係一個咁殘舊既商場入面，竟然有一間裝修得咁新潮嘅韓國餐廳！一坐低店員就預備左泡菜，黑豆同芽菜做開胃小食。一見到menu有部隊鍋，我就忍唔住叫左個芝士部隊鍋，肉類就揀左豬肉。鍋料都幾豐富，有辣炒豬肉，午餐肉，魚糕，金菇，烚蛋，椰菜同即食麵。爐邊有粟米，芽菜，芝士同蛋。大約滾5分鐘就可以食喇！湯底只係有由辣炒豬肉個度浸出既辣味，所以唔太食得辣嘅人都絕對冇問題。溶左既芝士加粟米真係好正，而爐邊蛋煮到半熟就可以食，十分滑嫩！成個鍋份量岩岩好夠2個人食。另外我哋都要咗一份韓式壽司，又係我最愛既午餐肉！饀料有青瓜，菠菜，蘿蔔，蛋同餐肉，用左韓國紫菜包住軟硬適中既米飯，好有媽媽準備既味道，簡簡單單已經好好食。一般韓國餐廳收費都比較貴，但呢度都算抵食，又坐得舒服，走既時候店員向我哋推介午餐下午茶放題，一次過可以滿足哂烤肉同火鍋，而且人均$100都唔洗，已經約定朋友下次過黎試！