文記車仔麵 (福榮街)

營業中

休息中

山竹大風球就快打到來，趁仲係風平浪靜的前一晚，拿拿臨去深水埗食碗麵，買少少餸打定底先!時間尚早，未見長長人龍，但新店已經要喺門外等位。我地一行五人於是就排隔離的總店，一邊諗下揀咩餸，一邊排隊等落order...當日不知道是否想快啲清貨，餸的份量好似闊佬左。一如既往，我都係叫米粉（$9），三餸就有豬腸，牛根，鴨腎。驚喜的是，我要求的是「瘦豬腸」。開頭見到呀姐剪了兩嚿仔，就停左手我心諗，「唔係掛，咁搵笨」，真係有一刻衝動，叫佢比多少少。好采原來呀姐去拎另一盤「豬腸」過來，入面都是瘦腸。呀姐拎起左一大條，見佢不停剪落個碗到真係正。眼見「瘦豬腸」入面得乾淨，肥膏都唔多覺，真係讚嘅~ 我好奇點解會闊佬到咁，同行的食伴指多數啲人選擇「肥腸」多，「瘦腸」滯銷喎!（唔知事實係咪呢？）另外，鴨腎幾本都比晒一整嚿，好多呀！初初以為都係比一半左右。最後，會問你加唔加辣，仲會幫你送到枱上，完全唔洗自己郁手。食落唔算太濃味或過咸，不過可能出左名，價錢都有番咁上下，都唔算話超抵。如果你貪心想叫多幾款貴價的餸，分分鐘去茶餐廳食一個set都唔洗依個價錢。