廚十三老壇酸菜魚 (渣甸街) (已結業)

約咗阿哥同阿嫂食晚飯，突然之間想食酸菜魚，咁就搵咗呢間度食。佢店內嘅環境其實唔錯 ，用咗好多檀仔做裝飾品，而且座位係梳化物料嚟嘅 ，枱同枱之間都有足夠嘅空間，唔會話太迫劫。 老壇酸菜魚(大份) $478呢度既酸菜魚就係佢嘅主打菜式，叫咗個正常嘅辣度，點知就出事啦。正常嘅辣度都好鬼辣，我哋三個人都唔係太接受到，要一邊食一邊係咁飲水。湯底淨係食到辣味，少少酸味都唔係太食到，唔知係咪我已經辣到冇咩味覺。至於啲魚片其實係ok嘅，分量都夠，而且都幾滑。如果下次真係要嚟再試可能要叫少少辣啦。 酥炸無面男 $88呢樣係炸豬肉條，整體嚟講都係一般般。食落口係脆嘅不過已經唔夠熱，而且冇咩味，要加啲辣椒粉增加少少味，而且份量感覺比較少。