燧記廚房 (荔安大廈) (已結業)

近排星期日唔想離開屋企，因為要留低煲返五集全民造星🤩。不過飯就點都要食嘅，而我會選擇買外賣，邊食邊睇嘛。夜晚我哋開外賣App揀咗嗌「燧記廚房」，自取有九折優惠。我哋一去到外賣就經已準備就緒🥡，原來餐廳有少量堂食座位，但店舖面積較細，住附近的話買返屋企食會比較舒服。小店主打川味小菜🥢，款式總共有十多款，當中唔少都帶有辣味。套餐同單點價只相差$5，而餐就多碗飯🍚同飲品/例湯，正常都會嗌埋吧。芳香惹味孜然牛肉($60/套餐)，估唔到呢碟牛肉落咗咁多辣椒同蔥炒，辣味強烈🌶，再加埋孜然香，整體係一道幾惹味嘅菜式，但千萬要小心唔好咬爆辣椒籽。牛肉約有十片，肉質唔韌🐮。有內涵紅燒馬鈴薯排骨($55/套餐)，呢道餸味道OK，但如果將排骨換上肉片會開心啲，因為唔使噒骨🐷🦴。菜式唔辣，鹹度適中，唔重口味，而且仲有唔少薯仔粒🥔，外面煎香内裡軟淋。是日例湯係蛋花紫菜湯🥚，味道偏清淡，普普通通啦，唔要湯可轉揀飲品。總括嚟講，今晚終於夾啱時間初嚐呢間經過多次嘅川味小菜外賣廚房😄。如果辣癮起，可以考慮嚟呢度食食。題外話，我留意到有唔少港大嘅內地生嚟幫襯，相信佢哋認為口味正宗呢。