峇峇娘惹 (MOSTown新港城中心(4期)) (已結業)

老師住馬鞍山，拜完年，順便就響嗰度食晚飯。行咗商場一圈，就扑鎚食呢間馬來西亞餐。唔知道係咪因為過年，餐廳內嘅人並唔多，除咗我，只有另外兩枱。餐廳風格簡約，牆上有幅畫，畫咗幾個著住娘惹衫嘅女人，都叫做有啲馬來西亞風味。一個人食飯，冇辦法食太多嘢，就嗌咗一個巴東牛肉飯同一份油酥餅。巴東牛肉煑得幾腍，亦都妥辣，啱晒鍾意食辣嘅朋友。除咗牛肉，仲有些少花生，青瓜同半個蛋做配菜。巴東牛肉嘅份量唔少，足夠撈哂成碟白飯！👍油酥餅喺我嘅情意結。喺香港唔容易搵到好食嘅油酥餅，馬拉文叫做Roti Canai，所以每逢睇到有呢個小食，就一定要試一下。可惜呢度嘅油酥餅都似其他餐廳咁，非常之一般，完全唔似我在馬來西亞食到嘅味道。不過我已經預咗係咁，所以亦都冇話特別失望。呢度嘅餅硬硼硼，一啲都唔鬆軟，反而係個咖喱汁幾好。總體來講，呢間馬來西亞餐廳都叫做唔錯，尤其是在香港，以咁嘅價錢可以食到啲特色食物都算係咁啦。