巴蜀烤全魚 (已搬遷) 新店位置

同太座行經吳松街，看到“阿龍咖喱”同“亞龍咖喱”嘅正印大戰，有人想混水摸魚，從中取利……本想試渾兩間品評一下，可惜新年的美食仍留在肚裡，少肉為妙！行過幾間鋪，見到“巴蜀烤全魚特色食店”知道係某網站選舉活動的最后入圍店鋪，就即管入去試下。我當然係叫咗佢哋嘅鎮店之寶“烤全魚”，有六款我揀，我哋想試麻辣又受唔到勁辣，又唔想食酸菜，店員後來介紹我哋食“泡椒味” 烤全魚（小半邊：$108），加全菜（大豆芽、秀珍菇、金針菇同芹菜：$18），送白飯兩碗。烤魚係用邊爐上嘅，其實個邊爐好淺，但係啲火力就恰到好處，食完嘅時候啲湯底最濃但又未乾，靚！ 烤魚係鲩魚，滾咁耐仲係滑嘅。 所以叫“烤魚”係因為放湯前搽咗豆鼓同孜然粉等香料烤過，所以層皮特別好食。 湯底放咗鮮、乾泡椒、醃酸咗嘅指天椒、京葱、元茜同麻辣醬料（我食得出嘅係咁多）十分惹味，但係我覺得金針菇比大豆芽更配合湯底，食到魚皮嘅時候有另一翻滋味，就好似叫咗兩様餸，一流！連我唔鐘意食魚嘅都讚，無腥味。唔知鐘意食魚嘅會唔會嫌唔夠魚味呢？ 唔食得辣嘅記住將泡椒、指天椒潑開，否則到最后啲湯底會辣得滯。 依店方食法是先食皮、腩，等湯底濃至食頭、尾，都有道理。