名館 (已結業)

約咗S&E响銅鑼灣食晚飯，聽聞希慎開咗間名館唔錯，今晚就去試試佢。店內有啲特別嘅2人孖位，單邊向住玻璃窗望街景，好似有個獨立空間咁。店員奉上蕎麥茶，好香。京川汁秋葵顏色新鮮，係微辣嘅涼拌，開胃。濃湯鮮蠔仔肉碎泡飯蠔仔大大粒唔會鯹，加咗肉碎、冬菇、蔥、芫茜，又香又清甜，好食。橋底混醬豬腸粉好耐無食過豬腸粉嚕，淋咗足足嘅甜醬、麻醬、辣醬，賣相已經吸引，加埋炒芝麻，又香又滑，好食。鐵板叉燒扒熱辣辣嘅叉燒扒，軟腍蜜味，超好味！蜂蜜柚子脆蝦球陣陣柚子清香，脆漿內蝦仁爽彈，食落酸甜開胃唔油膩。S最鍾亳食水煮魚，估唔到呢度有得食。鍋面放咗一大堆辣椒，麻辣飄散，香味四溢，微辣魚片滑溜美味，鍋內有寬條薯粉，口感滑韌，吸收咗鍋料精華，好味到呢......材料豐富，份量好多，4個人食極都唔完，好飽。金銀蒜銀魚蒸娃娃菜腍甜娃娃菜上面鋪滿配料，金銀蒜同小銀魚十分惹味。非常滿足嘅一餐。