一寿司 (已結業)

自從黑夜壽司提早左之後，一壽司就變左每個月都會黎一至兩次的飯堂，雖然成日見到7點幾門口就排左好長龍，但其實入面都幾多位，所以都唔會等太耐就可以入座。另外值得一讚係上菜時間比想像中快，原先以為半價壽司吸左好多客，廚房應該有排做，但好在D野都上得快手，唔會等到係咁催單。以前未有半價個時就開始食一壽司，質素方面都唔太差，依家半價之後基本上都Keep到水準，例如平時食開的帶子、鯛魚、油甘魚、劍魚、吞拿魚都好鮮味，特別係帶子，大大粒又厚肉，入口仲有甘甜，口感柔軟，食左咁多次都無話上碟時有問題，咁當然同貴價壽司店比係會差少少啦，但呢個價錢黎講就算係唔錯！