夢工房西日料理 (已結業)

想食平價放題，黎呢間夢工房就最岩啦，晚市只係$218，除咗有普通放題應該有嘅刺身炸物之類嗰啲嘢食，仲有得打邊爐。刺身嘅種類選擇都算多，又夠新鮮。個人推介佢嘅三文魚腩，肥得黎唔會好滯，又夠鮮甜。另外，佢嘅天婦羅都做得好出色，啲炸粉唔會好厚，天婦羅蝦嗌咗幾轉，每次隻蝦都係熱辣辣架。仲有佢嘅吉列炸蠔，隻蠔超級大隻，又唔會腥。芝麻雞翼啲雞肉超級嫩滑，仲係單骨㗎。芝士焗蠔係佢晚市嘅賣點之一，雖然賣相係唔錯，但係上面啲芝士有啲硬，夾起果陣同個蠔分開嘅，唔係話特別好食，所以嗌咗一轉之後就冇再嗌啦。雖然放題通常都唔會食好多壽司同卷物，但係個人認為如果黎食嘅話真係可以試吓。特別推薦佢嘅黑松露帶子壽司，有好香嘅黑松露味，細細件好易入口。壽喜燒湯底嘅邊爐好夠味，牛肉肉質嫩滑，好有牛味。其他配料例如芋絲、豆腐、菇類同菜類都好新鮮好好食。每一次黎都因為太飽所以冇機會食到佢嘅甜品，希望下次可以試吓佢嘅甜品啦。