意粉工房 (已結業)

南山邨除左有品香樓，其實係隔離既意粉工房都唔錯。本身係叫糖室，專做甜品，依加轉左手(定轉左型😂)主打平民意粉，甜品就聽聞係夜晚9點後會有(好似係🙈)。先講下麻辣鴨胸意粉($48)，麵身唔會太冧，因為唔想食太辣所以叫左小小辣，鴨胸煎得好香，呢款意粉都幾惹味。份量以我晚餐咁細食黎講，都算ok。飲品跟餐半價，或者加10蚊乳酪雪糕筒又得。另外我又試左個香蒜欖油哈哈哈意粉($50)，係用蝦、蝦乾、櫻花蝦煮成，口感層次分明，蝦肉夠爽滑，蝦乾有咬口，加埋啲香蒜，配搭中式得黎又唔突兀。總括而言，呢間餐廳既意粉走既係有小小偏住家意粉既風格，意粉黎講價錢親民，值得一試。