砵砵車仔麵 (已結業)

今日入元朗探朋友，順便喺附近搵野食，見到個名幾得意就決定食呢間。一入到去，個女仔就即刻招呼我哋坐低，都幾殷勤。呢度嘅車仔麵，麵底每款$8，最少要揀三樣餸，如果淨餸嘅話最低消費就＄30，另外仲有唔同嘅小食可以揀，所以車仔麵嚟講都算多選擇。我叫左個幼麵配麻辣肚絲、五香牛腩、秘制冬菇、芹菜木耳餃、韭菜餃加雲南酸辣汁。個人最欣賞肚絲、牛腩同冬菇：肚絲爽口惹味，牛腩唔會太肥，夠腍又入味、冬菇厚肉又軟滑。天氣咁乾燥，我梗係叫多個洛神花蜜潤一潤，不過味道稍為淡咗少少。朋友就叫左粗麵配香茅豬扒、蟹籽包、魚皮餃同豆卜加腩汁。 佢話個粗麵既掛湯能力唔錯，又夠爽口；豬扒好香口；魚皮餃鮮甜又彈牙。小食方面，阿里山茄子個汁酸酸甜甜好開胃，如果可以炸得再香脆少少就好啦；柚子蜜雞翼就非常香脆，而且仲有肉汁，唔會過乾，配埋個柚子蜜汁簡直係正。我哋食到七七八八嗰時，人開始多，但店員唔單只無催我，仲好好禮貌咁叫我哋唔使急。雖然呢間車仔麵價錢方面唔算特別平，但勝在選擇多又好味，同埋服務都幾好，大家入元朗都可以去試下。