軟橋米苔目餐廳 (已搬遷) 新店位置

米線周圍都有，但米苔目就唔係度度有，同埋呢度嘅小食都好出色。入到去係傳統嘅面鋪檯凳，唔算特別，但店員姨姨十分有禮貌，親切友善，有耐心咁介紹食物，比人有種家嘅感覺。我叫左一碗米苔目配番茄湯底，牛肉，木耳，生菜，粟米豬肉餃，走韭菜蔥。米苔目食落去口感煙煙韌韌，感覺好特別，我亦好鍾意呢個感覺，湯底係用鮮蕃茄製作，感覺好健康，牛肉嫩滑，木耳絲夠脆口，粟米豬肉餃帶有香甜粟米味。（$61）另外一碗係幼薯粉配豬骨湯底，金菇，冬菇雞肉餃，墨魚丸，酸菜。薯粉質感比較爽滑，金菇爽甜，墨魚丸鮮味彈牙，酸菜相對上比較普通，而冬菇雞肉餃最令我喜出望外，真係好香菇味，同雞肉配搭非常得宜。（$56）其實以我地呢啲「大餸子民」黎講每碗都叫四個餸真係抵到爛又可以食到好滿足。小食方面，我地叫左醉香豬雙脆（$25）同秘制豬大腸（$32）。醉香豬雙脆係豬耳同豬利，帶有少少酒香令人覺得開胃。秘制豬大腸炆得嫩腍，超級入味好食。如果唔鍾意食咁多肉嘅朋友可以試下Q彈豆腐，我以前試過也不錯哦。呢間餐廳唯一不足之處係鋪面比前面嘅檔口遮左，變得唔太起眼，但距離地鐵站只係兩分鐘路程，唔遠又抵食，所以都好推薦呢間餐廳。