1988 (已結業)

周一腹話下晝要去觀塘開會，6點前可以走得，係好機會出街食飯，觀塘啲工廈開左好多食肆，雖然好多多國菜餐廳有好高評分，不過我對多國菜無咩興趣，所以就㨂左呢間泰菜，好在我都有細心閱讀其他用戶嘅食評，話晚市walk in 係無位嘅，訂左6.30pm,餐廳唔大，去到已經半滿。一個星期前已經決定食1988，一早熟讀左餐牌同食評，坐低就即刻叫左鳳爪沙律，黃咖哩牛腩，蒜蓉法包，椰汁雞湯，炒椰菜苗，炸蝦餅，之後再追加炸雞翼。最先黎嘅係鳳瓜沙律，果然份量唔細，鳳爪好多，唔係好辣；之後係炸蝦餅，質地彈牙味道又夠，入口唔會太油；蒜蓉法包外皮焗得好鬆脆裡面軟熟，蒜蓉無打得好碎，食到一粒粒；椰汁雞湯係淺淺嘅白色，因為我平時好少點椰汁雞湯，所以唔知淺白係咪正宗嘅，飲到有椰汁嘅味道，最得意係飲完之後個口有種甜甜地係口腔停留，椰菜苗一直係最愛，份量好足。黃咖哩牛腩，咖哩好香，牛腩份量好足，因為我唔食牛，聽周一腹講，牛腩好淋有牛味，最後追加嘅脆脆雞翼到啦，果然同其他食評講嘅一樣，外皮好脆，雞翼好夠味，唔係迷你雞翼，好在最後決定追加呢個雞翼，真係必選。兩人埋單$500，畀周一腹笑我點菜太兇狠。最後想讚職員服務態度好好。