花見•幸福 (已結業)

難得星期五，收工唔駛趕返屋企訓覺，當然係相約朋友出去食下野、傾下計。上網見到新開左間日本餐廳，名叫「花見.幸福」，淨係名字已吸引左我地去試下。其實未去之前都知道價錢唔平，但去到見到套餐真係幾貴下，所以都係選擇散叫。叫左串燒盛合、美國安格斯雪花牛排及芝士御好燒。因為店員話如果廚司煮要預45分鐘一道菜，加上既然一場黎到，就自己煮下、玩下。牛排一上檯，120g有2大片，好色澤好靚，好吸睛，食落入口即溶，超正！串燒盛盒包括金菇牛肉卷、冬菇、日本黑豚肉腸、雞肉串及雞軟骨串，份量有點少，亦不是特別好食，感覺有點不值！而御好燒用料係好足，但食落無乜芝士味，與想像中有點出入！總括而言，想可以邊食邊玩，都可以一試！