元祖沾麵專門店

營業中

休息中

嚟到尖沙咀又想食日本嘢啦， 今日我哋喺厚福街附近， 朋友提議呢間元祖沾麵專門店， 佢話之前食過覺得幾好食。 原來呢度啲沾麵都幾有創意㗎，有好多唔同嘅配搭，我見到有芝士、海膽、龍蝦、蟹黃、鮑魚、帆立貝、赤蝦等嘅款式， 真係幾新奇。 我對蝦湯比較有興趣，所以叫咗個赤海老沾麵， 朋友就叫咗芝士海膽沾麵， 個麵上到枱 個湯係用個石鍋裝住， 保暖得好啲， 沾麵嘅湯keep住熱好緊要㗎，影完相就好快要開始食。 啲麵條都算彈牙， 開頭湯夠熱嘅時候係最好食， 因為一加咗麵落去個湯就會開始涼。 我個蝦湯未食已經聞到好香，加埋啲麵同配菜落去一齊食真係超級好食! 鍾意蝦嘅朋友一定唔可以錯過， 我覺得比喺普通魚介湯底或者豚骨湯底更加好食。 朋友嘅芝士海膽沾麵 一望就覺得好邪惡，個湯底都比較杰， 我同朋友都話個蝦湯好食啲，因為個芝士海膽雖然都幾好食，但係鹹咗啲，同埋我地唔鍾意個湯底太杰。 我朋友話下次會叫我個蝦湯沾麵 。我覺得呢度嘅啲沾麵都唔錯呀，價錢都合理，位置方便，環境又算乾淨，服務亦都ok。 如果有時諗唔到食乜，呢度都係個唔錯嘅選擇。