好蔡館

營業中

休息中

去開太子唔知食乜好，開Openrice掃吓，見到好蔡館，見到D食物好似幾吸引，所以就去試吓掂唔掂。位置都幾'隔涉', 唔睇地圖都好易miss咗。店面裝修好懷舊，大圓鐘，紙皮石，有D花樣年華嘅感覺。睇吓餐牌，好多嘢都未聽過，有别於一般潮州打冷，搞到我乜都想試！可惜只有兩丁友，只可以揀幾樣試吓。問吓阿姐蠔餅係咪炸嗰隻先？佢話唔係，即點！蜆肉撈飯，好似好正喎！叫埋。潮州最出名係魚蛋，咁一定要叫啦！D乜粿物粿都出名，最少兩隻起，咁叫嚟試吓！唔洗十分鐘，香噴噴嘅蠔餅出場，蠔餅係煎嘅，好香鴨蛋味，蠔仔超肥美，有成個五蚊銀咁大，好多蠔仔，一D都唔孤寒！點埋魚露，好味呀！蜆肉撈飯，唔算大碗，但所有材料都切得好仔細，蜆仔肉，韮菜，欖角同珍珠米，口感幾好，粒粒分明，只不過油咗少少！魚蛋+魚皮餃，湯幾鮮，魚蛋唔同出面嗰D，冇咁彈，但魚味重，應該冇溝咁多粉。魚皮餃細細隻，但皮餡薄靚，一啖一隻，唔錯喎！最後上嘅係荀粿同韮菜粿，賣相唔錯，餃皮呈半透明，可以直接睇到D餡料。咬一啖，皮好煙靱，餡料好新鮮，調味十分到位！令人回無窮！依間店仲有好多嘢想試，要再嚟先得！