炑八韓烤 (偉華中心) (已結業)

炑八分店遍佈全香港，梗有一間喺左近，沙田分店開咗咁耐，今日都係第一次試。午市韓式定食價錢由＄48至＄68不等，坐低後單都未落，店員就為我哋送上湯同埋餐前小食。我哋一行三人，叫咗雞扒蛋包飯，炑八牛肉蓋飯，同埋特級泡菜豬肉粉絲。雞扒蛋包飯賣相吸引，蛋仲處於半流心狀態，混埋啲飯一齊食都幾好味。雞扒賣相唔錯，入口都算嫩滑亦唔會太乾身，不過伴碟既沙律菜似乎有點兒唔夾。牛肉蓋飯賣相雖然唔差，但係如果可以將烚蛋改做太陽蛋，整體顏色會更加鮮豔，更加吸引。特級泡菜豬肉粉絲：上菜後要自行即時將所有材料拌勻，粉絲入口微辣，唔會太油，豬肉亦醃得幾入味。惠顧午市套餐只要加＄6就可以享用飲品，都尚算超值。我哋揀咗藍天使梳打同埋柚子檸檬梳打，賣相吸引，特色玻璃杯仲用咗精美匙羹，感覺非常精美，藍天使梳打入口唔會太甜，有少少檸檬味，似係檸檬梳打再加入藍色色素。呢度嘅食物雖然唔錯，但係服務態度絕對有改進嘅空間，建議店員多加留意客人嘅需要。除此之外，座位坐得非常之唔舒服，皆因枱上已有燒烤爐，若果唔燒烤嘅話，枱上嘅空間就非常之少啦。