丼瀛 (已結業)

今日係好多嘢食嘅廟街入面揀咗呢間日本菜同我朋友食晚餐。其中一個原因係因為覺得佢個築地壽司杯好特別，包羅萬有，好想試吓。第一個上既菜式就係佢，先食鮑魚片，非常爽口彈牙，啲蝦都好新鮮好大隻，但重頭戲係黑松露海膽同埋三文魚，我認為係黎到必叫！首先比佢地既色澤吸引住，海膽肥厚，濃郁甘甜，再加埋黑松露獨特既味道，兩者好match，會在口中會慢慢溶化。三文魚則片片新鮮肥厚、肉質細嫩、口感爽滑。第二道菜黎嘅係牛舌，因為我朋友鍾意食所以叫左，幾爽口，唔會"韌"。主食先上既係黑松露海膽炒飯，海膽依舊肥厚甘甜，今次比較原汁原味冇咗黑松露嘅襯托但都不失色，但個人較喜愛同黑松露一齊食，炒飯粒粒分明同乾身，仲有黑松露增加左炒飯既香味。之後再嚟一個小食 唐揚炸雞，熱辣辣出場，都能做到外脆內軟，肉質嫩滑。最後黎個安格斯牛肉壽喜鍋，個湯好清甜，配合埋娃娃菜金針菇牛肉咁食，為每樣食物加添左一份清甜，令人回味，而且份量都好多，食埋佢之後感到非常滿足。同食放題一樣咁飽，價錢同食放題差唔多，但食物質素比放題高，食物種類繁多，值得一試。