八幡屋日本料理 (已結業)

趁今日平日唔洗同咁多人迫又可以準時放工，就約左個朋友去試下呢間八幡屋日本放題。之前都成日見朋友係度打卡，所以一直都好想試。好在一早book左枱，平日黎講都好full下！值得一讚係門口既接待員服務態度好好，見到我友人未到，都好慇切咁招呼我入去一路揀住野食一路等，讚！放題黎講，食物選擇唔算話特別多，但部分會寫住推介及必試等等，反正未食過，我就將佢推介必食系列都寫2份！食物黎得好快，但放既位置有限，我同友人都要好高速咁將食物放入口，又要相機食先，真係好忙。 第一味比較深刻既係黑松露帶子壽司，呢個配搭真係第一次食，兩者味道都好鮮甜，所以配搭住黎食都唔會互相搶左知味道，可以encore! 超喜歡食海膽既我當然要試試海膽手卷啦，個present好特別，令成件事開心左～雖然第一眼望落海膽既色水好似唔同平時見到既，但係食落口又幾鮮甜喎！ 食完壽司打底，就輪到食炸物啦，呢度既炸物同小食款式都幾多，叫左都係寫住必試系列，每次食日本野必食既炸魷魚圈，炸香芋波同埋芝麻雞翼。炸香芋波就非常出色，外脆內軟，香芋味一發不可收拾，係口腔不斷徘徊，我想瘋狂咁食炸香芋波呀！