漁釧 (V Walk)

營業中

休息中

南昌新商場V walk食店林立，不過高質嘅餐廳就唔算多，今日我哋兩個人一齊去試吓新開嘅日式居酒屋，裝修環境十分貼近日本當地嘅水準，令你似乎置身於日本一樣。呢間舖頭主打吞拿魚，吞拿魚相當新鮮，刺身切得好厚身，食落去呢就非常之香濃鮮甜。另外必試嘅桂花梅酒，飲落去一啲酒精嘅感覺都冇，好清新好易入口，有淡淡嘅桂花味，再加上酸酸嘅梅味，真係令人食指大動啊！吞拿魚系列嘅壽司同埋沙律都非常新鮮，係好有水準嘅出品，令人繼續有胃口去試吓其他嘅食物！由於係居酒屋嘅關係啊，好多嘢都比較鹹，例如干燒魷魚一夜干，同埋炭燒雞，呢兩樣嘢都係非常之好送酒嘅，推介俾鍾意飲酒嘅你！至於清酒煮生蠔就好適合唔係好飲得但係又想嘗試下清酒嘅人，清酒同蠔非常之夾，好清新，令你一啖一啖停唔到落嚟，而且飽滿多汁。如果鍾意一路食一路飲吓酒又同朋友傾吓計嘅你呢，非常建議你過嚟試吓，坐得舒服之餘，又能夠嘗試下唔同嘅送酒菜式。