百味鮮辣蟹專門店 (已結業)

當港鐵去到堅尼地城，西環石塘咀再唔係咁遠啦！港鐵除咗心連繫生活每一程，佢仲將我同A姐嘅美食地圖再擴大。今次，我哋去到西環百味鮮辣蟹專門店，食海鮮。好彩有訂位，如果唔係都唔知要等幾耐！青芥牛立方牛立方？水立方啲Friend呀？其實係牛柳粒，呢個名都貼切！牛立方牛味濃郁，一啲都唔韌，配埋爽口嘅青瓜同攻鼻嘅青芥茉，好開胃，正！乾煎桂魚骨腩店員極力推介我哋叫呢個菜，全因成碟都係桂花魚最滑嘅骨腩位，要兩三條桂花魚先做到呢味菜。成條魚型碟上枱，加埋魚頭圖案嘅秘製醬汁，好吸引。桂花魚骨腩煎到金黃色，好香口呀! 不過如果鍾意啖啖肉嘅朋友，呢個未必啱你啦！咖喱蝦煲原本諗住叫蟹㗎，點知賣晒…… 為咗滿足食海鮮嘅願望，就叫嗰咖喱蝦煲。咖喱汁好香濃，海蝦新鮮彈牙，都算幾大隻，有成十一二隻。蒜蓉菜心為咗健康，叫碟菜先。蒜蓉菜心，簡簡單單，清甜爽脆。漁村風味炒米唔想食白飯，叫個炒米粉。有帶子同蝦，非常足料，不過味道較淡，撈埋咖喱蝦煲嘅咖喱汁，就Perfect！