何洪記

營業中

休息中

同朋友喺希慎行完誠品搵嘢食，於是上咗十二樓食何洪記。入到餐廳嚇一跳，咩事裝修得咁鬼靚，一啲都唔似粥麵舖，坐出面嗰排卡位勁似港女下午茶嗰啲feel，tiffany blue梳化再加小小吊燈，不得了。去何洪記一定要食雲吞麵，碗麵熱辣辣好鬼過癮，食到殊殊聲。麵好彈牙，雲吞好得，湯底鮮甜，我成碗飲晒，飲完唔覺口渴。另一個一定要試嘅係乾炒牛河，聽講連蔡瀾都讚好。試完覺得好有鑊氣，每條河粉都炒得好均勻，最緊要係唔油膩，你知啦，乾炒牛河同油係掛勾架，但何洪記嗰碟我又唔覺油喎，最起碼隻碟食完係唔油呀。最後唔夠飽叫多個xo醬煎腸粉。頂呀，係我食過最出色嘅煎腸粉！少辣好惹味，個醬油好香，腸粉唔係嗰啲硬到可以打人嗰種，煙煙un un，好可惜個醬油無得另外買，如果唔係都想買返枝。