泰中意 (已搬遷) 新店位置

琴日屋企人生日🎂嚟咗食泰國嘢慶祝。當中有三樣食物真係想大推！黃咖喱軟殼蟹$258（menu冇的），我地想食蟹，店員就推介食黃咖喱軟殼蟹☺️，店員話想食蟹要一天前預訂，因為想確保新鮮。黃咖喱上枱係咖喱汁同軟殼蟹分開上，軟殼蟹食嘅時候仲係鬆脆😊唔會淋灑，好貼心👍🏻第二樣就係炭燒豬頸肉，炭燒永遠都係最好味😋更加焦香惹味。我鍾意呢到豬頸肉切得厚薄適中，泰式甜酸醬亦調得啱啱好。第三款就係泰式燒鱔，燒至金黃色，魚皮脆卜卜，肉嫩多汁。每款食物都係誠意之作，價錢亦都親民。一家人食得好滿足。