Explorer Fusion Restaurant (已結業)

去石門飲茶就試過不少次，今次就去一間西日fusion餐廳食晚餐，出奇地有驚喜。餐廳裝修似酒吧，好有外國餐廳風格，但係原來有日本野食，啱晒我呢個鍾意多元化嘅食客。前菜就點左一個凱撒沙律配溫泉蛋＄68 ,份量不少，有機生菜上面灑滿芝士粉，簡直係心心眼啦，侍應提醒我地將溫泉蛋混埋沙律才會更好味，可能個人不太喜歡煙肉，覺得有少少咸。水牛城棒棒雞，同一般嘅水牛城雞翼有點不同，我比較喜歡這一種，不會被醬汁掩蓋雞肉本身的味道，這款棒棒雞帶少許辣味，不會太乾身，非常好食。焗芝士肉醬薯角，薯角一向係我賣飛佛，肉醬滿滿佈在薯角上面，芝士亦非常多。特選刺身（竹）$398，係今晚重點推介，刺身厚切而且鮮甜，每一件都係重量級，個人最喜歡海膽帶子，海膽滑口，唔會有腥味，帶子鮮甜，而且非常大粒，咁既價錢絕對超值。慢煮挪威三文魚配牛油蘆筍，三文魚外皮煎得脆脆，裏面依然保持油份，不會overcook,蘆筍用牛油煎香，非常爽脆。慢煮西班牙黑毛豬，賣相非常吸引，肥瘦比例剛好，很有咬勁，餐廳不會用過多嘅醬汁掩蓋豬肉嘅味道，值得一讚。藍莓芝士蛋糕，細細件份量剛好，原來係海綿蛋糕，如果係芝士餅底會更好，但整體不錯。