民聲冰室 (已結業)

民聲冰室，原來只係芸芸餐廳小店之一，自從有了招牌菜，頓時客似雲來，名人明星不遠而至，紆尊降貴，逼喺街邊，只為一嘗只此一家嘅鹹蛋肉餅。大坑總店，每日飯市都客似雲來，一位難求，但自從喺東大街開咗分店，每月初二，十六拜城隍都令我充滿期盼。拜完神都可以獎勵自己。其實民聲嘅午飯套餐水準高於同儕，但我只鍾情於鹹蛋肉餅飯。呢度家常菜普遍媽媽都識整，但要達到民聲嘅水平，殊不容易，要做到肉飯鬆化有咬口，酥香醒胃，除子選料審慎，更需要堅持同心思。     肉餅要有咬口，唔會散晒變肉鬆，要訣係唔可以用機免治，因絞肉機會破壞肉嘅纖維，反之，要用刀剁，而且醃肉時要用豆粉同水，代替油，肉餅蒸起先會鬆化。       另外民聲選用原隻新鮮鹹蛋，每次入爐蒸先打鹹蛋上肉餅山，咁鹹蛋蒸出嚟先會酥香。         畫龍點睛，最後淋上特制豉油，應該以老抽加糖同其仔嘢調教，混和肉汁，微甜醒胃，以本人經驗，一碗飯絕對唔夠o候,連扒兩碗飯，汁都撈埋，食完唔口乾，臨床測試無味精。食飽環顧四週，原來不經不覺又全場爆滿。       「山不在高，有仙則名，水不在深，有龍則靈」只要民聲一直保持水準，相信好多客人都會不辭勞苦去支持。