沾仔記麵食

營業中

休息中

小店位於佐敦廟街，主打多款傳統麵食，平民價錢，足料又飽肚。店內環境唔大，預咗要搭枱，但座位之間有適當距離而且都幾乾淨，留意返7:15 last order，想食嘅記得要早啲去。食物款式唔多，主要配菜為雲吞、鯪魚球同新鮮牛肉，然後再揀麵類。單/雙/三拼，每樣加$6，轉蠔油撈麵、蟹籽撈麵嗰啲就要再額外加錢。唔想要配料亦可以淨係揀麵食或者小食。雲吞皮超薄身，入邊有成三至四粒爽口彈牙嘅蝦，調味啱啱好，唔使額外點醬都可以。鯪魚球大大粒，真材實料冇得彈、牛肉份量唔少，牛味突出，但因為厚切所以唔算超級滑。麵食要咗幼麵、粗麵同河粉，放咗一段時間都唔會變硬身，但係會索湯所以都係建議快食。幼麵吸滿湯汁、粗麵帶點咬口，個人幾喜歡、河粉滑嘟嘟，唔夠飽嘅可以加底，另外加埋醋、豉油、胡椒粉可改變口味，食落冇咁單調。