Amitie Kitchen

營業中

休息中

位於尖沙咀厚福街嘅H8有好多有質素嘅餐廳，部份係連鎖店，亦有部份係只此一家嘅小店，今日我就選擇咗呢一間冇其他分店嘅Amitie Kitchen。呢度午市做嘅set lunch價錢唔貴，仲有撐香港人嘅平民午市特餐。另外亦有午市優惠推介，主要係較高質嘅扒類。我哋揀咗一個set lunch，配嘅係南瓜湯，南瓜湯真材實料，飲得出係用好多南瓜肉打成，接近南瓜蓉嘅口感。另外我哋叫咗個Appetizer，揀咗香煎法國鴨肝多士伴車厘子醬，仲有啲加咗黑醋汁嘅沙律菜拌碟，味道清新。香煎法國鴨肝超厚身，份量比起多士還要多，而且鴨肝嘅味道同口感都不比鵝肝差，個人覺得性價比都算高。午市優惠推介嘅紐西蘭牛扒味道都唔錯，薯菜配搭亦都豐富，又紅又綠嘅蔬菜令賣相生色不少。豬柳本菇扁意粉伴明太子忌廉汁嘅明太子醬汁混入咗忌廉之後變得香而不辣，而且濃稠度剛剛好，令每條意粉都掛滿醬汁，豬柳同本菇嘅份量都唔少，仲混入咗紅黃椒粒，口感豐富。餐茶就簡單選擇熱咖啡同熱奶茶，咖啡夠香濃，奶茶夠香滑，都係唔錯嘅選擇。