慢煮工業 (已結業)

糧尾又想出街食飯可以考慮下呢間良心慢煮店，有唔少價錢相宜嘅選擇，當然都有豬手、肉眼扒等，豐儉由人。餐廳掛上唔少霓虹燈裝飾，燈光偏暗，提供多款手工啤，好啱放工後黎小酌。🍽法式芝士香茄焗薯本來以為係焗盤上，原來係的骰嘅薯仔塔，入面夾左番茄粒，配黑醋汁幾得意。🍽美式芥末豬仔脾豬仔脾啖啖肉，慢煮所以肉質唔鞋，外層搽左甜甜嘅燒汁，再加少少芥末吊味，唔錯。🍽龍蝦汁香蒜大蝦意粉意粉用煲仔飯嘅砂鍋上幾搞怪，有兩隻彈牙嘅香煎虎蝦，意粉同洋蔥、三色椒、雜菇等一齊炒，個汁蒜味較突出。🍽芝士煙肉薯條邪惡嘅芝士煙肉薯條壓軸出場，份量好大，薯條鋪上厚厚嘅芝士同灑上煙肉粒後拎去焗，無可能唔好食。🍺Sleenbrugge Dubbel Bruin (Bel)（6.5%）餐牌有超過十款手工啤，花多眼亂，有帶花香嘅，亦有水果味，我地揀嘅呢款比利時啤酒好濃麥味，用黎配紅肉唔錯。