樂天皇朝 (已結業)

我今次好耐冇食過中餐，今次係朋友推薦， 因為呢間嘢價錢可以接受到，而且還境好闊落，座位舒適，食物種類都好多，所以好值得一試 。嚟到樂天皇朝當然一定要叫個八種味嘅招牌小籠包，佢分別有原味， 人參，芝士 ，蟹粉 ，香蒜，麻辣， 鵝肝，黑松露嘅味道 ，跟住指示一層層咁食上去， 每種味道都好吸引，好香口。最尾嘅麻辣味更加係畫龍點睛 ，其他味真係成世都未必有得試，例如鵝肝味小籠包，同黑松露味小籠包。 鵝肝味估唔到同小籠包嘅汁同埋豬肉嘅味係夾㗎。另外我哋叫咗醉雞， 雖然我哋冇叫到雞脾，但係啲雞肉都整得好滑， 酒味都好香濃， 整得算唔錯。我哋仲叫咗上海風味醬鴨， 味道都叫做係第一次試 ，好特別， 而且係好惹味。椒鹽小黃魚都唔錯㗎，佢一條已經係好大條，魚肉嘅肉質好嫩滑， 層魚皮好脆口，令到成個餸菜都好有口感，再加埋上面嘅蔥同埋蒜頭炒得好香，增加曬成個味覺層次感。我哋仲叫咗蔥油餅添熱，辣辣好好食，仲好飽！甜品方面，我哋仲要咗擂沙湯圓同埋香煎豆沙鍋餅。擂沙湯圓層麵粉充滿口感，上面啲粉都係令到啲湯圓好有香味。豆沙鍋餅層皮炸得非常脆，真係一流，仲要好夠熱。裏面嘅豆沙嘅料有超多，簡直係大滿足！