冧廚 (已結業)

屯門友介紹呢間超抵食放題店冧廚，睇一睇價錢牌，嘩～唔係掛，有雞煲，韓燒同打邊爐三樣野加埋都係＄158一位，七點半前離座仲＄138添，抵到無朋友喎！入座後先睇睇環境有咩食先，店雖然細，但抽風ok，無好大陣油煙味。燒肉櫃都幾多款，一般豬牛雞魚同蔬菜都有。熟食區炸薯條，魚皮，人參雞湯同炒飯。仲有咖哩魚蛋，滷水牛肚，娃娃菜。另一盤有口水雞，無骨鳳爪同皮蛋，個口水汁勁正喎，呢三樣好好味，encore好多轉。飲品在雪櫃拎，如果唔想飲甜野有樽裝水，有凍有唔凍～先黎嚐嚐雞煲，要左小辣，呢個辣度個人覺得剛剛好。撈一撈已經香噴噴！雞件入味好食喎，可以無限添加正呀！同行嘅達人達人教路，食到咁上下加入青菜同茄子索一索個雞汁，唔單止啲蔬菜入曬味，仲可以出番啲水令到個汁無咁乾，咁樣整法又真係好好味噃，不禁都加咗兩次雞煲，嘩嘩，要留肚食其他㗎，哈哈。怕太飽就唔打邊爐跳去食韓燒，呢度個爐用油紙墊底，無咁黐爐有冇咁易燶。肉類蔬菜都ok啦，餃子有驚喜，皮薄餡多燒起好香口。最後食埋甜品真係飽到爆啦～甜品有豆腐花，奶凍，芒果布甸等，同行達人話有時有雪糕杯添㗎，呵呵。好飽好飽，呢個價錢真係超值！