一粥麵 (大本型)

營業中

休息中

同朋友去響鑽石山做完嘢趕住去油塘，諗住中間時間快快脆脆食少少嘢填下個肚，但係油塘嗰頭唔係好熟地方，咁就直接簡單香港商場嗰度搵咗一粥麵食，地點方便鄰近地鐵站響商場入邊，望落都乾淨企理，不過唔知係咪接近晚飯時間，所以要搭枱，不過問題都唔大。唔知點解我朋友覺得送餐機械人好得意，可能之前一段時間佢太少出嚟食嘢。我叫咗一個咕嚕肉飯餐，個餐原來有跟埋個雲吞雞鍋，仲有一杯茶，碗飯亦都好大碗，所以淨係依份量你計真係好抵食。仲有送多一張抽獎券添。白飯冇乜嘢特別，軟硬適中，咕嚕肉味道都算還可以嘅，份量都尚可，係有部份咕嚕肉會比較淋咗少少冇咁香口。但係仲要加埋個雲吞雞喎，真係有一隻原隻雞響度，仲有幾粒雲吞，個湯都幾甜，隻雞就冇想像中去到咁淋，但係食落味道都OK嘅，重點係呢個餐嘅價錢加埋真係好化算，下次再有機會經過可以試吓其他嘢。