Cafe 8 (已改名) 查看

公司特登揀左係海防博物館附近嘅Cafe 8 開staff meeting。我行入去嘅第一個印象，就係啲野食真係好貴，例如:一個tart要成$60。不過開會冇杯野飲係隔離，總係覺得差咁啲野，所以我就order左杯熱朱古力。點知個waitress一送杯野上黎，我就即刻「嘩」左聲。個拉花未免太靚啦！!😄我以前一直都未見過咁靚嘅拉花!!! 影左n張相之後，我先捨得飲杯野。杯朱古力入口香滑，同我平時係屋企用粉沖嘅，真係有啲分別。開會開到咁上下，就順便食埋個lunch。今次我order左一份雞肶。份配菜加左少少芝麻醬之後，真係好夾。至於個雞肶都唔錯，裡面嘅雞肉都好嫩滑。唯一我覺得可以做得好啲嘅，就係個雞肶外皮可以再脆啲。下次有機會，我一定要再去嘆多杯熱朱古力，一嘗做中產嘅滋味。