廚十三老壇酸菜魚 (渣甸街) (已結業)

早前有朋友推薦我試吓依間喺銅鑼灣嘅酸菜魚餐廳，仲話絕對唔會令我失望！餐廳整體唔係好大間，但係環境絕對乾淨。仲安排咗我哋坐梳化位，非常舒服嘅！嚟到就梗係要食酸菜魚啦，我哋兩個人就叫咗一個細嘅，另外仲有中size同埋大size嘅。話就話細份，但係份量絕對唔細！佢除咗有勁多我最愛嘅酸菜之外，魚嘅份量亦都好多！所以兩個人食一定有突！酸菜魚仲可以俾我哋加配料，我哋就加咗午餐肉同埋寬粉。午餐肉就都係正常水準，寬粉就超彈牙，同酸菜魚個湯好夾！講返個酸菜魚先，我覺得酸菜魚最重要係個湯底夠酸，而佢就絕對做到。另外麻嘅味道亦都好足夠，絕對係有平時喺內地食嘅酸菜魚嘅水準，甚至可以話係超越某啲舖頭添！另外我哋仲叫咗糍粑小食 ，唔知大家有冇食過。佢係有少少似炸咗嘅麻薯咁，外脆入面就QQ嘅，仲會有啲黑糖俾你點嚟食。我同我朋友就十分之鍾意！嘢飲方面就叫咗兩杯特飲，分別係荔枝梳打同埋提子梳打，唔會太甜又大杯！ 雖然依間餐廳價錢可能比平時內地食嘅酸菜魚貴少少，但我覺得以餐廳環境同埋食物質素來講，絕對對得住呢個價錢！叫埋三五知己嚟傾偈慢慢食就最啱啦～