Ha Noi 越南菜

營業中

休息中

最近知道重慶大廈呢度開咗個新嘅美食坊，今日就同個同事過嚟試咗呢間越南餐廳，買啲嘢返office度食。裏面裝修都幾靚牆身嘅畫都好有越南特色。我就叫咗個順化牛肉撈檬同埋加左個越式豬頸肉小食。同事就揀咗個順化番茄蟹肉扎肉湯檬同埋份越式炸蝦餅小食。首先要大讚個牛肉撈檬係非常之好食，牛肉醃得好食，另外佢嘅檬粉我都覺得畀出面嘅越式餐廳出色，份量又夠多。豬頸肉亦煎得非常香口，邊邊位焦香，肉食落嫩嫩，好味道。至於同事個番茄蟹肉扎肉湯檬，我試左少少確實又係非常出色，湯底濃濃番茄湯味，食完又唔會口渴，真番茄製作，而且味道豐富，唔係單純番茄味，一開外賣碗，見到一絲絲蟹肉，仲有豆卜吸晒湯汁，非常滋味，扎肉同湯檬同樣出色，相比下，我更愛同事個湯檬，推介！ 蝦餅炸到金黃色，好吸睛，熱辣辣，食落Q彈，仲咬到少少粒粒蝦肉，好食！餐廳食物cp值十足，下次夠時間都要再堂食回味下。