譚仔雲南米線 (已結業)

糧尾時間，放工兩個share食個經濟大大碗米線～以前只得圓枱格局，相信唔少人試過一個人去食嘅時候，比阿姐叫轉位幾次。而家就唔同，好多分店有細枱同卡位，人流分散左其他分店，轉位可能都係一次半次。座位舒服左，好在味道同以前差不多。過橋米線（蕃茄湯底）- 近年新湯底，從字面到賣相都感覺健康少少。每種餸都有d，墨丸、牛丸、魚蛋就各一粒，一般超市丸類味道；牛肉雞肉豬膶都易咬開；不過話就話感覺健康左，但食得出調味偏咸，蕃茄味唔算濃。麻辣豬耳 - 一貫作風用細豬耳，少肉多脆骨，配合佢地嘅麻辣汁，加上少少芫茜蔥粒，變成我耐唔耐就好想食嘅味道。土匪雞翼 - 皮嘅腌料係好惹味香口，肉係保持一絲絲滑雞口感。不過唔知點解今次食有其中兩隻好膻味，可能新舊貨撈埋左用？順帶一提，因為水吧先有得斟水，問阿姐攞水飲要正式落單嘅。譚仔話不變，自小食慣呢種味道，迫使我食唔慣同根嘅譚仔x哥。