茶檔

營業中

休息中

喺香港仔做嘢做咗一段時間，基於疫情，經常都會喺附近嘅茶餐廳買外賣返公司食，食過咁多間，就係情有獨鍾呢間叫茶檔嘅茶餐廳。《干炒叉燒河》🐷🔥間舖頭只係小店，座位只有幾枱，但係日日都爆滿坐，嚟買外賣嘅人都非常多。論價錢，呢一間茶餐廳唔係最平，但味道一定係附近之中最好嘅。食過佢幾款午餐，都係情有獨鍾佢嘅干炒叉燒河。食得炒河就唔會怕佢肥膩，反而係怕有啲餐廳用唔夠油炒，而呢度嘅炒河就做到條條河粉都非常分明，唔會好似某啲餐廳咁炒到有啲河粉一舊舊。河粉方面，餐廳用上幼河粉，一般嘅餐廳都只會用呢種幼嘅河粉嚟做湯河粉，但而家攞左嚟炒，反而有驚喜，我覺得仲好食過用粗河粉。至少呢間茶餐廳唔似其他咁誤將貴刁同河粉混為一談。雖然只係小店，但係佢嘅炒河真喺非常夠鑊氣，及得住大排檔，而且佢嘅用料都非常足料，叉燒、韭黃、芽菜、芝麻同蔥全部有齊，連同河粉落鑊大火炒起，香氣十足，就連我附近嘅同事聞到都口水直流。最後再配埋一杯標準嘅港式茶餐廳香滑奶茶，為我整個下午差足電。