華星冰室 (筲箕灣東大街)

營業中

休息中

每次諗唔到食咩都一定會黎食華星。每次黎到華星都唔使諗，一定係叫「常餐叉燒通粉炒蛋熱奶茶」。次次落完單啲野食就好快黎到，唔使等。叉燒通粉既湯底好得意，有少少杰身，唔會太水；味道好香，唔會太濃味太鹹。通粉煮得啱啱好，口感彈牙。叉燒都幾大塊，仲有好濃既蜜汁味。佢既常餐仲跟埋牛油厚多士，火腿同炒蛋。厚多士烘得外脆內軟，仲塗滿牛油，一咬落去口感非常鬆軟。我最鐘意佢既炒蛋，炒得好滑好香，帶少少蛋汁，唔會炒得太老，真係好想再encore呀！奶茶亦都係好正，好滑。茶味濃郁，帶少少茶既澀味，茶同淡奶既比例啱啱好。配埋厚邊杯飲，簡直係一流既享受。值得一提既係華星冰室除左好食同抵食之外，仲好有人情味。小事一則：櫃枱姐姐一見到出面有警察抄牌就即刻大嗌問有無人泊左車，話有警察抄緊牌。然後就見到好多人即刻埋單衝出去攞車，櫃枱姐姐仲好快手配合佢地，見到有人杯野未飲晒仲即刻幫佢轉用外賣杯比佢拎走，真係超好人。